يا 100 خسارة على الفشل
لما الرضوخ ينتج كسل
القدس
ضاعت مننا
خليكوا نايمين في العسل
تطبيع كمان
ما الأمة
نسيت مجدها
والنخوة
ضاعت من زمان
والدم
في عروقنا اختفي
والود أصبح للكيان
والجامعة ماتت وانتهت
تقديرها باين للجميع
تحت الضعيف
في الامتحان
لكنهم طمسوا
هوية أرضهم
واختاروا صف
الأمريكان
أدوا اللي مطلوب
بامتياز
الأقصى هان
رضيت عليهم أمهم
كسبوا الرهان
سمحولنا نبكي ونعترض
لكن سيان
الأمر واضح عندهم
تصبح جبان
ممنوع تزلزل عرشهم
وإياك
تشاور ع اللي خان
خلي ابن عمك ينقتل
طول ما انت عايش في الأمان
دورك ديكور
أو سوسته راكبة في بنطلون
خلّوا الوطن تعريفة
زي البنسيون
عندي يادوب خمسين سنة
والقدس قصة كل يوم
طواحين هوا من غير غيوم
لا نقطة نزلت م السما
ولا جيبنا ترياق للسموم
عندي الجراح ومتلتلة
مش باينه من تحت الهدوم
على جوعنا
ولا على العطش
نقدر نصوم
لكن نكون عاجزين كده
والقدس راحت مننا
ومفيش حلول
يوم ما اتسأل من ربنا
أنا إيه ها اقول
ها اقوله ضاعت أرضنا
ساعة ذهول
وفضلنا ساكتين كلنا
وكأننا حبة عجول
وإيمانا راح من قلبنا
والرعب عشش في العقول
هو اللي يغضب ربنا
يلقى القبول
عايزين نفوق
نفسي في عمر
نفسي في صلاح يرجع لنا
يمكن نقوم
أيوا اتحادنا في حلمنا
يمحي الهموم
تعالوا بس
في صفنا
أصل احنا أهل وربنا
ما احناش خصوم.